XII. Edizioa

Urriaren 1tik urriaren 10ra 2021

Sarrera askea izango da jarduera guztietan, edukiera bete arte. Osasun-egoera bereziaren ondorioz, gonbidapen zenbakituak behar dira 2021ko edizioko ekitaldietara sartzeko. Orri honetan deskarga daitezke, irailaren 25tik aurrera.

Ongi etorri,

ikusle errespetagarriak eta txertatutako pertsonak, Ja! jaialdiaren edizio berrira. Hamabi urte bete baditugu ere, oraindik ez gara nerabezarora heldu, eta aurten ere pentsamendu garbiekin eta Errege Magoei jostailuak eskatzen dizkieten haurren ilusio berberarekin prestatu dugu egitaraua. Guztira, 14 saio emango ditugu, Kinder arrautzetako sorpresak bezain desberdinak, urriaren 1etik 10era, Elkarte Filarmonikoan eta BBK Salan.

Aurten, Frantziako hiru idazle izango ditugu: Hervé Le Tellier (azkeneko Goncourt Saria), Philippe Lançon (funtsezkoa den ‘El colgajo’ entseguaren egilea) eta bigarren aldiz bisitatuko gaituen Mathias Enard (zabala eta ezaguna da haren obra). Lançon eta Enard ondo moldatzen dira gaztelaniaz, eta, beraz, ez dute interpreterik beharko.

Gonbidatu batzuek labetik atera berri dituzten liburuak aurkeztuko dizkigute: ‘Los vencejos’ (Fernando Aramburu); ‘Subidón’ (Joaquín Reyesen lehenbiziko eleberria); ‘Mansos’ (Bob Pop); ’Feria’ (Ana Iris Simón); ‘Los años extraordinarios’ (Rodrigo Cortés); ‘Vivir no es tan divertido, y envejecer, un coñazo’ (Oscar Tusquets); ‘La casa del ahorcado’ (Juan Soto Ivars) eta ‘La muerte del hipster’ (Daniel Gascón).

Bilboko Metroan Flavita Bananaren binetak erakusteko jarriko diren hamar panelek ere ilusioa egiten digute. Ongietorrikoa, adibidez, badirudi apropos eginda dagoela jaialdirako, haren izaera ezin hobeto irudikatzen duelako. Flavita Bananak umore garratza eta zorrotza du, eta, horregatik, sarritan estualdian egon izan da sare sozialetan. Ezagunak ditugu sentimentalismo kursiaren gehiegikeria horiek, zentsuratzeko ahalegin arriskutsu bihurtzen direnak. Ja! oso kritikoa da umorearen oinarrizko askatasunari eraso egiten dioten atzerapen horiekin. Horregatik, aurtengo egitarauari hasiera emateko, Soto Ivarsek eta Ana Iris Simónek elkarrizketa izango dute ‘La feria de los ahorcados’ izenburupean.
12. edizioko kartelak ez du inolako azalpenik behar (behar den moduan), eta, izan ere, xiringa batekin ordeztu da Ja! logotipoaren harridura-ikurra, erremedioaren, zorigaitza gainditzearen eta halabeharrezko umore-senaren adierazgarri. Espero dugu ondo pasatzea eta barre egitea gurekin, pasadan urtean baino gogo gehiagorekin.

Umore segurua Ja! jaialdian.
Juan Bas eta Carolina Ontivero
Jaialdiko zuzendariak

Pin It on Pinterest